पुणेरी टाइम्स टीम..दौंड तालुक्याच्या पूर्व भागात सध्या राजकीय समीकरणांमध्ये नव्या हालचालींना सुरुवात झाली आहे. या भागात युवा नेतृत्व म्हणून “अमरसिंह परदेशी” हे नाव वेगाने पुढे येत असून, त्यांच्या जनसंपर्क मोहिमा आणि संघटनबांधणीमुळे अनेक जुन्या राजकीय दिग्गजांच्या कपाळावर आठ्या उमटल्या आहेत.
पवार, काळे, जगदाळे आणि काळभोर यांसारख्या अनुभवी नेत्यांच्या कार्यक्षेत्रात परदेशी यांच्या वाढत्या लोकप्रियतेमुळे नवीन समीकरणे तयार होताना दिसत आहेत. विशेषतः खडकी, स्वामी चिंचोली, मलठण, लोणारवाडी, काळेवाडी, राजेगाव, वाटलुज, आलेगाव आणि खोरवडी या गावांमध्ये परदेशी यांचा प्रभाव वाढत असून, स्थानिक पातळीवर त्यांना उत्स्फूर्त प्रतिसाद मिळत असून, त्यांच्या कार्यशैलीतून लोकसंपर्क आणि संघटन कौशल्याची झलक दिसत आहे. दौंडच्या पूर्व भागात महिला मतदारांचा कौल यावेळी निर्णायक ठरण्याची शक्यता असून, परदेशी यांनी या मतदार वर्गाशी थेट संपर्क साधण्यासाठी विशेष मोहिमा सुरू केल्या आहेत. गावागावातील महिलांशी संवाद साधत त्यांचे प्रश्न जाणून घेण्याचे आणि विकासाचे आश्वासन देण्याचे काम त्यांनी हातात घेतले आहे.
राजकीय निरीक्षकांच्या मते, सध्याच्या स्थितीत मतदार नवीन चेहऱ्याला संधी देण्याच्या विचारात आहेत. अशा वेळी परदेशी यांची संयमी, जनसंपर्ककेंद्रित भूमिका आणि स्थानिकांशी असलेली जवळीक त्यांना आगामी निवडणुकांत “डार्क हॉर्स” बनवू शकते. दौंडच्या पूर्व भागात येत्या काही महिन्यांत राजकीय समीकरणे कशी बदलतात, आणि परदेशी यांचे नाव प्रत्यक्ष निवडणूक रंगमंचावर कितपत प्रभाव टाकते, हे पाहणे औत्सुक्याचे ठरणार आहे.
